Guida turar

Lom skifestival samarbeider i år med Fyrst og fremst og Jotunheimen Husky Lodge som tek deg med på guida turar fredag og laurdag. Guidane har kjennskap til fjella vi skal inn i. Dei har fjellerfaring under huda og turglede og formidlingsevne som berre ventar på å sleppe til på skifestivalen. På Lom skifestival legg vi ikkje vekt på målet, men på å gje deg ein god og lærerik tur. Vi legg turen dit den gode snøen er. Plass på guida turar er forbeholdt deltakarar med festivalpass. Meld deg på i god tid slik at vi får sikra oss dei trivelegaste guidane. 

Treng du å leige randonée-utstyr? Vi samarbeider med Naturopplevingar eit steinkast frå Norsk fjellsenter. Send inn bestilling til Naturopplevingar i god tid, så står utstyret klart på Norsk fjellsenter når du kjem.

Husky og ski

1900,-
Start skituren med ditt eiga huskyspann og avslutt med fine svingar på vinterens fyrste snø. Kombinasjon av skitur og hundesledetur tek skituren og leiken til nye høgder. Dei firbeinte barskingane kjem frå Jotunheimen Husky Lodge og er hoppande glade for å dra deg med på tur. Etter ei runde med hundesleden på Valdresflye, klyv vi vidare opp til ein av fjelltoppane i området i følgje med ein lokalkjend guide. Tilbake til bilen svingar vi fint for eiga maskin. NB! Endeleg destinasjon for turen kan endra seg ut frå snømengde og vêrforhold. FREDAG / LAURDAG
Skileik med Haglöfs

Skileik med Haglöfs

750,-
Klar for ein leiken tur med leikne skiambassadørar frå Haglöfs? Tør du prøve deg på ein salto, eit dropp, eller andre sprell som kan krydre skiturane dine framover? Bli med på Haglöfs-tur. Med på turen er også ein lokalkjend førar. LAURDAG

Minikurs i snøskred

1050,-
Vil du bli tryggare på tur? I dette minikurset går vi gjennom grunnleggjande skredlære inne på kvelden, og arbeider med terrenget for å kunne gjera trygge og gode vegval ute på tur. Du blir inga ekspert i løpet av desse dagane, men får med deg gode tips og verktøy for å kunne førebu deg betre inn mot skisesongen. Minikurset startar med ein teoridel torsdag 10. november klokka 19.00 til 21.00. Fredag dreg vi ut på tur så du får ei praktisk erfaring i terrenget. TORSDAG OG FREDAG

Tur med lokalkjend førar

750,-
Vil du ut på tur med ein stødig, trygg og lokalkjend førar? Da er dette turen for deg. Vi har det ikkje travelt på tur, men søker å finne den beste snøen for best mogleg køyring. Er det vêr og føre for det, dreg vi innom ein topp. NB! Det er godt mogleg turen går same plass fredag og laurdag. FREDAG / LAURDAG

Bli ein betre skikøyrar

750,-
Er du klar for å ta skikøyringa di til eit høgare nivå? På denne turen er det fokus på køyring og mengdetrening på svingar. Vi leiter fram dei beste snøforholda slik at du kan få med deg både god læring, grunnleggjande køyretips og praktiske triks. Dersom skiheisen er ope på Galdhøpiggen Sommarskisenter, nyttar vi denne. Heiskort kjem da i tillegg. FREDAG / LAURDAG

Nybyrjartur

750,-
Ny på topptur? Bli med på ein dag fylt med gode råd, smarte triks og turglede. Her kan du bli kjend med utstyret, deg sjølv og kva som skal til for å få ein fin dag i fjellet. FREDAG
DSC_8088